25 de agosto, guarani ñe’ẽ ára

Paraguái ningo herakuãmomby
opa hendápe pype ojeporúre peteĩ indígena ñe’ẽ: guarani. Jahahápe ambue tetãme
kóva ñandekuaa; upévare ja’ekuaa guaraniha hína pe mba’e ñanemopeteĩ ha
ñanemoambuéva ko yvy tuichakue javeve. Upevére, ñanesãsomi rire tetã haicha
1811-me, ñañepyrũ jahechagi ha ñamboyke ñane ñe’ẽ ha hendive ñande rapo tee.

Opaite Léi Guasu
(Constitución Nacional) osẽva’ekue ñane retãme 1842 guive 1940 peve naimandu’ái
guarani rehe; castellano añónte pe Estado ñe’ẽ, jepémo kóva sa’ietereive
ojeporu guaranígui. 1967-pe ae Léi Guasu imandu’a Paraguái iñe’ẽ mokõiha.
Artículo 5 oñe’ẽ Paraguái iñe’ẽmokõiha, katu castellano añoite ha’etaha Estado
ñe’ẽ tee; artículo 92 katu omanda Estado-pe ombo’e ha omyasãivo guarani ñe’ẽ.
Kóva ko Léi Guasu oñemboaje 25 de agosto, ha upévare guarani ñe’ẽ
mayasãiharakuéra ojapyhy GUARANI ÑE’Ẽ ÁRA ramo.

Hi’ãite guarani ha
iñe’ẽharakuérape og̃uahẽma ára pyahu; hi’ãitéma tetã háicha jajapyhy ñande reko
tee ha ñandeaguara hendy ñañe ñe’ẽ mokõi ha ñande rekojopara haguére.
Péicharamo ikatúta jajetyvyro tetã háicha ha ñasẽ opaichagua jejepovy vaígui.

TOIKOVE GUARANI, TOIKOVE
PARAGUÁI